ሓደጋታት ዘይሕጋዊ/ዘይስሩዕ ስደት

ካብ ከም ኤርትራን ኢትዮጵያን ዝኣመሰላ ሃገራት ናብ ኤውሮጳ ንምብጻሕ ዝህቀን ዘይሕጋዊ ጉዕዞ ኣዚዩ ነዊሕ፡ ክባር፡ ከምኡ’ውን ሓደገኛ እዩ። ኣብ ነብሲ ወከፍ ስጒሚ ናይቲ ጉዕዞ፡ ስደተኛታት ብመርበባት ገበነኛታት፡ ኣሰጋገርቲን ዕጡቓት ጉጅለታትን ንዝፍጸም ኩሉዓይነታዊ በደልን ምዝመዛን ዝተቓልዑ’ዮም። እዚ ምስቲ ባሕሪ ኣብ ምስጋር ዝጎንፍ ባህርያዊ ሓደጋ ተደሚሩ ዓመታዊ ብኣሽሓት ዝቚጸሩ ዘይሕጋውያን ኣፍሪቃውያን ስደተኛታት ናብ ገማግም ኤውሮጳ ከይበጽሑ ሂወቶም ይስእኑ ኣለው። ስለዝኾነ፡ ነዚ ዓይነት ጉዕዞ ዝሓስቡ ሰባት ኣብ ቅድሚኦም ንዘለው ንሂወት ዝፈታተኑ ሓደጋታት ከስተብህሉሎም ኣዚዩ ኣገዳሲ’ዩ።