ውዕል መሰል ህጻናት ውድብ ሕቡራት ሃገራት ኣብ ካሌ ናይ ፈረንሳ ዕለታዊ ይጠሓስ

ሲዲቕ (ሓቀኛ ስሙ ኣይኮነን) ወዲ 14 ዓመት ኣፍጋናዊ ኮይኑ ኣብ’ቲ ኣብ ካሌ ናይ ሰሜናዊ ክፋል ፈረንሳ ዝርከብ ጫካ ተሓቢኡ ብዘይ ዝኾነ ኣላዪ ዝነብር ዘሎ ትሕቲ ዕድመ ስደተኛ’ዩ። ምስ ከምኡ ዝኣመሰሉ ኣላዪ ዘይብሎም 250 ካልኦት ትሕቲ ዕድመ ስደተኛታት ድማ ኣብ’ቲ ቃልዕ ቦታ ብዘእኹል መግቢ፡ማይን መጽለሊን ይቕመጥ።

ንሱ ምስ ጀርመናዊ ማዕከን ዜና ዶቸ–ቨለ ኣብ ዝገበሮ ቃለ–መሕትት፡ ቅድሚ ክልተ ዓመት ዕጡቕ ሓይሊ ጣሊባን ኣብ’ታ ዝነብረላ ዝነበረ ምብራቓዊት ኣውራጃ ናንጋርሃር ኣትዩ ንኣብኡን ሓውን ምስ ቀተለሉ ናብ ስደት ከምዘምርሐ ይዛረብ። ብመንገዲ ኢራን፡ ቱርኪ፡ ሃገራት ባልካንን ጀርመንን ኣቢሉ ድማ ድሕሪ ነዊሕን ኣሸጋሪን ጉዕዞ ናብ ፈረንሳ በጺሑ።

ኣብ’ዚ ሕጂ እዋን ምስ ከምኡ ኣርባዕቲ ትሕቲ ዕድመ ስደተኛታት ብሓባር እንዳነበሩ ብዘይዝኾነ ገንዘብን ውሕስነትን በተን ካብ ገለ ገበርቲ ሰናይ ትካላት ጥራይ ዝረኽብወን  ንኣሽቱ ሓገዛት ህይወቶም ይመርሑ ኣለው። ሲዲቕ ነታ ጉጅልኡ ‘ባምቢኖስ’ ኢሉ’ዩ ዝጽውዓ።

መንግስቲ ፈረንሳ ኣብ ካሌ ብዘይ ዝኾነ ኣላዪ ዝነብሩ ዘለዉ ትሕቲ ዕድመ ስደተኛታት ናይ መጽለሊን መሰረታዊ ጠለባት ሂወትን ኣገልግሎታት ከውሕስ ሕጋዊ ሓላፍነቱ እዩ ነይሩ። ‘ረፉጂ ዩዝ ሰርቪስ’ (RYS) ዝተባህለ ሰብኣዊ ትካል ምስ ዶቸ–ቨለ ኣብ ዘካየዶ ቃለ–ምልልስ ግን ኣብ ፈረንሳ ነቶም ትሕቲ–ዕድመ ስደተኛታት ዘጽልላ ማእከላት መሊአን ምህላወንን ሰብ–መዚ እታ ሃገር ድማ ነቶም ስደተኛታት ንምሕጋዝ ዘድሊ ፖለቲካዊ ቅሩብነት ከምዝውሕዶምን ይሕብር። ኣብ 2018 ኣብ ካሌ  580 ትሕቲ ዕድመ ስደተኛታት ናይ መጽለሊ ሓገዝ ጠለብ’ኳ እንተቕረቡ፡ ኣመሓደርቲ እቲ ከባቢ ሓደ ኣካለ–ስንኩል ናይ ዝርከቦም 270 ትሕቲ ዕድመ ስደተኛታት ጠለብ ከምዝነጸግዎ እዩ እቲ ሰብኣዊ ትካል ዘረድእ።

“እቶም ቆልዑ ናብ ካሌ ቅድሚ ምብጻሖም ኣብ ጉዕዞ ድሮ ተደራራቢ በደላት ዝበጸሖም’ዮም። መብዛሕትኦም ፡ ብፍላይ እቶም ብሊብያ ዝሓልፉ፡ ኣብ ጉዕዞኦም ግዳያት ዝተፈላለየ ዓመጽን ምዝመዛን ከምዝኾኑ እዮም ዝምስክሩ። ነዚ ኹሉ ጸገም ሓሊፎም ኣብ ካሌ ምስ በጽሑ ድማ ኣዚዩ ሕሱም መነባብሮ ይጎንፎምን መጻኢኦም ክጽልምቶም ይረኣዩን ኣለው፡” ይብል ሰራሕትኛ ‘ረፉጂ ዩዝ ሰርቪስ’ ዝነበረ ኣቶ ጀረሚ ሮኳስ ን ዶቸ–ቨለ ኣብ ዝሃቦ ሓበሬታ።

‘ ሄልፕ ረፉጂስ’ ዝተባህለ ተሓላቒ ማሕበር ኣብ’ቶም ኣብ ፈረንሳ ኣብ ልዕሊ ትሕቲ–ዕድመ ስደተኛታት ብኣባላት ፖሊስ ዝፍጸሙ በደላት ኣመልኪቱ ዝስንዶም 244 ጉዳያት’ውን፡ ስደተኛታት ዘጽልሉሎም ቴንዳታት ብኣባላት ጸጥታ ብቐጻሊ ከምዝቕንጠጥ፡ ዝርካቡ ንብረቶም ከምዝህገር ፡ ከምኡ ድማ ኣብ ልዕሊ’ቶም ስደተኛታት ኣካላውን ኣእምሮኣውን ጸቕጢ ዝፈጥሩ መግረፍቲን መንከስቲ ናይ ፖሊስ ኣኽላባትን ከምዝበጽሑ  እዩ።  ‘ረፉጂ ዩዝ ሰርቪስ’ ምስ ‘ዩቶፒያ56’ ዝተባህለ መዘናኡ ማሕበር ኣብ ዘውጽእዎ ሓበሬታ’ውን፡ ካብ ሰነ ክሳዕ ታሕሳስ ናይ 2018 ጥራይ ኣብ ካሌ ብሰንኪ በደላት ኣባላት ፖሊስ ብውሕዱ 10 ቆልዑ ስደተኛታት ናብ ሕክምና ከምእተወስዱ ክፍለጥ ተኻኢሉ’ሎ።

“ቆልዑ ስደተኛታት ልክዕ ከምቶም ብዕድመ እኹላት ዝኾኑ ስደተኛታት እዮም ዝግፍዑን ብኣባላት ፖሊስ ዝዋረዱን ዘለዉ፡” ዝበለት ኣካያዲ ስራሕ ሰብኣዊ ማሕበር ‘ረፉጂ ዩዝ ሰርቪስ’ ኣብ ከተማ ካሌ ዝኾነት ማዲ ኣለን ፡ “መንግስታት ሃገራት ኤውሮጳ  ካብ ምንባይ እዞም ተነቀፍቲ ስደተኛታት ክሕብኡ ይመርጹ ብምህላዎም፡  ውዕል መሰል ህጻናት ውድብ ሕቡራት ሃገራት ዕለታዊ ክጠሓስ ንርእይ ኣሎና” ክትብል ወቒሳ።

TMP – 01/03/2019

ስእሊ፡ ዶቸ–ቨለ። ከባቢ 250 ኣላዪ ዘይብሎም ትሕቲ ዕድመ ስደተኛታት ኣብ ሰሜናዊ ፈረንሳ ኣብ ኣዚዩ ቆራሪ ከባቢ ይነብሩ።