Thousands of Nigerian migrants forced into prostitution in Italy

The Oga pata pata for National Agency for the Prohibition of Trafficking in Persons wey be NAPTIP, Dame Julie Okah-Donli, don talk say na force dem force many Nigerian women wey dey Italy to dey do ashawo work.

The Oga for NAPTI talk say na International Organization for Migration wey be IOM, na dem comot this informate. Na where E dey talk for lecture wey E title,” Mass exodus of youths and national development: A case of Nigeria-Libya-Europe migration trend” for inside Delta State, Nigeria, na im E yarn this one.

E come talk say many women wey dey do ashawo work by force for Italy na women wey dem deceive before dem carry them go there. E say na Edo, Kano and Delta States na dem dey carry first for states wey dea women dey do ashawo work by force for Italy.

“After Edo and Kano, na Delta State na im follow for rank on top state get people wey dem deceive carry go Italy. Na our work to make sure say we protect our pikin from this wicked people wey dey deceive dem dey carry dem go Italy on top of kurukere road. All of us go make sure say we fight dem to make we country safe.”

The Governor of Delta State, wey be Dr. Ifeanyi Okowa, dey for the place and himself talk am say E no dey happy say na Delta n aim carry third position for all the states wey dem carry im people for this kurukere travel and human trafficking for we country, Nigeria.

The governor yarn say everybody must join hands to make sure say the problem of kurukere travel and human trafficking no dey again for Delta state. “All of us go join body to fight this problem. How person go spend big money to go to a country like Libya or Mali where people dey kill other people? This people wey dem dey carry no dey know where dem dey go. Dem go kill some of them and carry their liver or even sef kidney to do money ritual.”

Okah-Donli  come talk say parents and everybody wey wan make we solve this problem must support government to make sure say Nigerians stop this dangerous journey

TMP – 06/09/2018

Where you fit get de photo : www.pulse.ng. Nigeria ashawo for Italy.