ናብ ታንዛንያ ብዘይሕጋዊ መንገዲ ብምእታዎም ተኣሲሮም ዝጸንሑ ኢትዮጵያውያን ስደተኛታት ናብ ሃገሮም ተመሊሶም

ኣህጉራዊ ውድብ ስደተኛታት (ኣይ.ኦ.ኤም) ናብ ደቡብ–ኣፍሪቃ ንምብጻሕ ናብ ታንዛንያ ብዘይሕጋዊ ኣገባብ ብምእታዎም ተቐይዶም ዝጸንሑ 67 ኢትዮጵያውያን ስደተኛታት ብመስርሕ ወለንታዊ ምምላስ ናብ ሃገሮም ኣግዒዙ።

እቲ ኣህጉራዊ ውድብ ምስ መንግስቲ ታንዛንያ ብምትሕብባር ነቶም ኣብ’ታ ሃገር ተዳጒኖም ዝጸንሑ ስደተኛታት ኣብ ምልቃቕን ናብ ሃገሮም ክምለሱ ዘኽእልዎም ናይ መገሻ ወረቓቕቲ ኣብ ምጽፋፍን ከምዝተሓጋገዘ ይገልጽ። እቶም ተመላሶ ቅድሚ ናብ ሃገሮም ምባሎም፡ ኣብ ርእሰ–ከተማ ዳርኤ–ሰላም ናይ ታንዛንያ ዘድሊ ሕክምናዊ ክትትልን ዓይነታዊ ሓገዛትን ከምእተገብረሎም ክፍለጥ ተኻኢሉ’ሎ። እቶም 67 ኤትዮጵያውያን ስደተኛታት ብ 28 መስከረም 2018 ኣብ ኣህጉራዊ መዓርፎ ነፈርቲ ቦሌ ናይ ኣዲስ–ኣበባ ኣትዮም ኣለው።

እቶም ተመላሶ ናብ ሃገሮም ኣብ ዝኣተውሉ ፡ ነብሲ–ወከፎም ምስ ውሁብ ኩነታቶም ዝኸይድ ክጣየስሉ ዝመርጹ ዓይነት ሂወት ንምፍላጥ ዘኽእል ቃለ–ምምልስ ምስ ኣባላት ኣህጉራዊ ውድብ ስደተኛታት ከምዘካየዱ’ውን ክፍለጥ ተኻኢሉ ኣሎ። እዚ ድማ እቶም ስደተኛታት ምስ ሕብረተሰቦም ብዘይጸገም ዝጽንበሩሉ ስሩዕ መደባት ኽውን ንምግባር ዝዓለመ እዩ።

ልክዕ ከም’ቲ ኤውሮጳ ንምብጻሕ ዘሎ ባህጊ፡ ናብ ደቡብ–ኣፍሪቃ ንምእታው ዘኽእሉ መስመራት እውን ብሓያሎ ስደተኛታት ከም ኣማራጺ ይውሰዱ ከምዘለው እዩ ዝንገር። ኣብ ዝሓለፈ ወርሒ ሓምለ ናይ’ዚ ዓመት ኣፍሪቃዊ ሕብረት ኣፍሪቃውያን ኣብ ኣህጉሮም ብነጻ ክንቀሳቐሱ ዘኽእል ንድፊ ሰነድ ምፍራሙ ዝዝከር ኮይኑ፡ እቲ ሰነድ እንተወሓደ ተቐባልነት 15 ኣባላት ሃገራት እቲ ሕብረት ከይረኸበ ተግባራዊ ከምዘይከውን ይሕበር። እንተኾነ ፡ ኣብዚ ቀረባ እዋን – ታንዛንያ ካብቲ ዝፈረመትሉ ሰነድ ግልል ኢላ ንገለ ዜጋታት ካልኦት ሃገራት ኣፍሪቃ ብዘይ ቪዛ ናብ ሃገራ ከይ–ኣትው ዝድርት ውሳኔ ትሰርሓሉ ኣላ። እቲ ውሳኔ፡ ዜጋታት ኢትዮጵያ፡ ናይጀርያን ጂቡቲን ናብ ታንዛንያ ኽኣትው እንተመዲቦም ሰለስተ ወርሒ ኣቐዲሞም ቪዛ ክሓቱ ዝጠልብ እዩ።

እዞም ኣብ መወዳእታ ወርሒ መስከረም ካብ ታንዛንያ ናብ ሃገሮም ተመሊሶም ዘለው ኢትዮጵያውያን ስደተኛታት፡ ኣብ ውሽጢ ዓመተ 2018 ናይ ፈለማ ኣይኮኑን። ኣህጉራዊ ውድብ ስደተኛታት ኣብ ዝሓለፈ ወርሒ ሰነ እውን ኣብ ዝተፈላለያ መዳጎኒ ማእከላት ተቐዪዶም ዝጸሑ 300 ኢትዮጵያውያን ስደተኛታት ነጻ ኣልቂቑ ናብ ሃገሮም መሊሱ’ዩ።

ኣሽሓት ኢትዮጵያውያን ስደተኛታት ናብ ደቡብ ኣፍሪቃ መጽዮም ቊጠባዊ ኩነታቶም ንምምሕያሽ ነዊሕን ኣህላኺን ጉዕዞ ከምዝሓልፉ’ዩ ዝንገር። እቶም ስደተኛታት ንኸም ኬንያ፡ ታንዛንያ፡ ዛምብያ፡ ማላዊን ዚምባብዌን ሰጊሮም እዮም ናብ ደቡብ ኣፍሪቃ ክበጽሑ ዘለዎም። ኣብ’ዚ ንኣሰጋገርቲ ልዑል መጠን ገንዘብ ከፊሎም ዝሓልፍዎ ጉዕዞ ብኣባላት ሓለዋ ዶባ’ተን ዝሰግሩወ ዘለው ሃገራት ምስ ዝተሓዙ ድማ ከቢድ መቕጻዕቲ ማእሰርቲን ከሕልፉ ይግደዱ።

TMP – 19/10/2018

ስእሊ፥ ኣይ.ኦ.ኤም። ኢትዮጵያውያን ተመላሶ ኣብ ኣህጉራዊ መዓርፎ አፈርቲ ጁልየስ ኔረረ፡ ዳርኤ–ሰላም።